महाधिवेशनबाट नेतृत्व बदल्ने कुरा मुख्य हो : गगन थापा


काठमाडौं । नेपाली कांग्रेसका नेता गगन थापाले आगामी महाधिवेशनबाट पार्टीको नेतृत्व बदल्ने कुरा मुख्य रहेको बताउनुभएको छ ।

नेपाली कांग्रेस काठमाडौं जिल्ला कार्यसमिति सभापति पदका उम्मेदवार कृष्ण बानियाँ समूहको उम्मेदवारी घोषणा कार्यक्रमलाई सम्बोधन गर्दै नेता थापाले आफू महामन्त्री हुने कुरा गौण भए पनि पार्टीको नेतृत्व बदल्ने कुरा मुख्य रहेको बताउनुभयो ।

नागरिकलाई देश बदलिन्छ र अब राम्रो हुन्छ भन्ने विश्वास र भरोसा चाहिएको उल्लेख गर्दै कांग्रेसमा त्यो भरोसा दिनसक्ने नेतृत्व चाहिएको उहाँको भनाइ छ ।

नेता थापाले पार्टीको नेतृत्व बदल्न चाहनेहरूको बिचमा एकता र समझदारी हुनु आवश्यक रहेको बताउनुभयो । कसले नेतृत्व गर्दा राजनीतिक रूपमा न्याय र जायज हुन्छ उसको नेतृत्वमा जानुपर्ने उहाँको भनाई छ ।

कार्यक्रममा पूर्वमहामन्त्री नेता प्रकाशमान सिंहले वर्तमान पार्टी नेतृत्वले कांग्रेसलाई सानो आकारमा सीमित गराएको भन्दै नेतृत्व परिवर्तन हुन नसके पार्टीलाई आगामी दिनमा गाह्रो हुने बताउनुभयो ।

कांग्रेस काठमाडौं जिल्ला समितिमा गगन थापा र प्रकाशमान सिंहको समर्थनमा कृष्ण बानियाँको प्यानल चुनावी मैदानमा छ ।

प्रतिक्रिया दिनुहोस्