कांग्रेस वडा अधिवेशनः ३५ जिल्लामा सम्पन्न, दोलखाका ७४ मध्ये ७३ वडामा सर्वसम्मत


काठमाडौँ– सत्तारुढ दल नेपाली कांग्रेसको शुक्रबार देशभरका ३५ जिल्लामा वडा अधिवेशन भएको छ । केन्द्रीय निर्वाचन समितिका संयोजक महादेव यादवले शुक्रबार ३८ जिल्लामा वडा अधिवेशन हुनुपर्ने भए पनि ३५ जिल्लामा अधिवेशन भएको जानकारी दिए ।

उनले भने, ‘हामीले पहिलो चरणमा खटाएका ३८ जिल्लामा आज अधिवेशन हुनुपर्ने हो । ३५ जिल्लामा अधिवेशन भएको जानकारी आएको छ । बाँकी तीन जिल्लाबारे जानकारी प्राप्त हुन सकेको छैन ।’ उनका अनुसार धेरैजसो वडाहरुमा सर्वसम्मत भएकोसमेत बताए । तर, शुक्रबार अधिवेशन भएका जिल्लाहरुको नतिजा भने प्राप्त भइनसकेको उनले बताए । शनिबारसम्म नतिजा प्राप्त हुने उनको भनाइ छ ।

शुक्रबार एकमात्र जिल्लाको नतिजा केन्द्रीय निर्वाचन समितिसम्म आइपुगेको छ । संयोजक यादवका अनुसार दोलखा जिल्लाको सम्पूर्ण नतिजा आएको छ । दोलखामा रहेका ७४ वडा मध्ये ७३ वडामा सर्वसम्मत अधिवेशन भएको उनले जानकारी दिए । एक वडामा भने चुनाव भएको छ ।

उता मनाङमा वडादेखि जिल्ला अधिवेशनसम्म सर्वसम्मत भएको बताइएको छ । तर, संयोजक यादवले सर्वसम्मत भए पनि प्रक्रिया पूरा नभएकोले अहिले नै केही भन्न नसकिने बताए ।

देशमा रहेका करिब ६ हजार वडा मध्ये आधामा शुक्रबार अधिवेशन हुँदा २१ जिल्लाको भने क्रियाशील सदस्यतासमेत टुंगिएको छैन ।

निर्वाचन समितिले हालसम्म ५६ जिल्लामा मात्र निर्वाचन सामग्रीसहित निर्वाचन अधिकृत खटाएको छ । संयोजक यादवले बाँकी २१ जिल्लाबारे निर्णय भइनसकेको बताए । यी जिल्लामाहरुमा वडा अधिवेशनमा मतदान गर्ने क्रियाशील सदस्यबारे टुंगो नलागेको हो ।

वडा अधिवेशनले वडा कार्य समिति र स्थानीय तह अधिवेशन, प्रदेश निर्वाचन क्षेत्र अधिवेशन, संघीय निर्वाचन क्षेत्र अधिवेशन, महाधिवेशन प्रतिनिधि र जिल्ला अधिवेशनमा मतदान गर्ने क्षेत्रीय प्रतिनिधिको चयन गर्छ ।

वडाबाट आउने प्रतिनिधिहरुले महाधिवेशन प्रतिनिधिको पनि चुनाव गर्ने भएकाले यो महाधिवेशनको यो प्रारम्भिक चुनाव हो । वडा अधिवेशनले नै भावी नेतृत्वकोसमेत छनोटमा महत्वपूर्ण भूमिका खेल्छ

प्रतिक्रिया दिनुहोस्