उच्च शिक्षामा त्रिविको पृथक् पहिचान


प्रधानमन्त्री शेरबहादुर देउवाले त्रिभुवन विश्वविद्यालयले उच्च शिक्षामा आफ्नो पृथक् पहिचान र गरिमामय इतिहास निर्माण गर्न सफल भएको बताएका छन् ।

विश्वभर महामारीका रूपमा फैलिएको कोभिड–१९ का कारण व्यक्तिगत, सामाजिक तथा राष्ट्रिय जीवन अस्तव्यस्त रहँदा पनि विश्वविद्यालयले वैकल्पिक विधिको प्रयोग गरी आफ्नो शैक्षिक तथा अनुसन्धानसम्बन्धी गतिविधिलाई निरन्तरता दिएकोमा आफू हर्षित भएको उनले चर्चा गरेका छन् ।

त्रिभुवन विश्वविद्यालयको ६२औँ वार्षिक दिवस बैठकलाई आइतबार पठाएको शुभकामना सन्देशमा प्रम देउवाले कठिन परिस्थितिमा पठनपाठन र परीक्षाका नयाँ विकल्पको प्रयोगबाट उच्च शिक्षामा दक्ष जनशक्ति उत्पादनमा विश्वविद्यालयले नेतृत्वदायी भूमिका निर्वाह गरेको बताए ।

आगामी दीक्षान्त समारोहमा दीक्षित हुन योग्यता पुगेका विद्यार्थीलाई प्रम देउवाले बधाई ज्ञापन गरे । त्यस अवसरमा विश्वविद्यालयका कुलपतिसमेत रहनुभएका प्रधानमन्त्री देउवाले वार्षिक दिवसको बैठकको अध्यक्षता गर्ने अधिकार उपकुलपति प्रा.डा. धर्मकान्त बाँस्कोटालाई दिएका थिए।

कार्यक्रममा उपकुलपति बाँस्कोटाले कोभिड–१९ को महामारीको जटिल परिस्थितिका बीच पनि एसियाली विश्वविद्यालयमा गत वर्षको तुलनामा १००औंँ स्थान माथि स्तरोन्नति प्राप्त गर्न विश्वविद्यालय सफल भएको जानकारी दिए।

विश्वविद्यालयलाई प्रविधिमैत्री बनाउने अभियानमा सूचना प्रविधि र विद्युतीय कक्षामा उल्लेखनीय सफलता हासिल गरिएको, पाठ्यक्रम विकास केन्द्र, परीक्षा नियन्त्रण कार्यालय र डिन कार्यालयहरूमा अनलाइन माध्यमबाट आवेदन बुझाउने व्यवस्था गरिएको उनले बताए ।

विश्वविद्यालयका शिक्षाध्यक्ष प्रा.डा. शिवलाल भुसालले कोरोना भाइसका कारण सिर्जित जटिल परिस्थितिका कारण विश्वविद्यालयको वार्षिक दिवस बैठक अनलाइन माध्यमको सहयोगमा गर्नुपर्ने अवस्था आएको बताए । गोरखापत्र दैनिकमा खबर छ ।

प्रतिक्रिया दिनुहोस्