खुल्यो आन्तरिक उडान, विमानस्थल जानुअघि जान्नुपर्ने तीन कुराहरू यस्ता छन्


कोभिड महामारीको दोस्रो लहरका कारण बन्द गरिएका आन्तरिक हवाई उडानहरू जुलाई १ बिहीवारदेखि खुला गरिएको छ।

जनस्वास्थ्यका मापदण्ड पालना गर्ने गरी अर्को निर्णय नभएसम्म यसअघि हुँदै आएका उडानको आधा सङ्ख्यामा गर्ने गरी आन्तरिक उडान खोलिएको अधिकारीहरूले बताएका छन्।

उच्चतम सावधानीका लागि यात्रुहरूले कोभिड-१९ सङ्कट व्यवस्थापन केन्द्र सीसीएमसीले व्यवस्था गरेको उडानसम्बन्धी फारम अनिवार्य भर्नुपर्ने नियम बनाइएको छ।

कोरोनाभाइरस सङ्क्रमणका कारण झन्डै दुई महिनादेखि नेपालभित्र हुने नियमित हवाई उडानहरू बन्द रहेका थिए।

सरकारले क्रमिक रूपमा निषेधाज्ञालाई खुकुलो पार्दै लगेको अवस्थामा आन्तरिक उडानहरूले सञ्चालन अनुमति पाएका हुन्।

सीमित उडान
सेवा सुरु गरिए पनि उडान सङ्ख्या भने कटौती गरिएको नागरिक उड्डयन प्राधिकरणले जनाएको छ।

सामान्य अवस्थाको तुलनामा ५० प्रतिशत कम उडान हुने बताइएको छ अर्थात् दैनिक ६७ वटासम्म नियमित उडान हुनेछन्।

प्राधिकरणले कुन वायुसेवा कम्पनीलाई कति उडान भर्न दिने पनि तोकेको छ।

बुद्ध एअरलाई दैनिक ३१ वटा, यतीलाई १५, श्रीलाई १० र सौर्यलाई तीन वटा उडान अनुमति दिइएको प्राधिकरणका प्रवक्ता राजकुमार क्षेत्रीले बताए।

“यी ट्रङ्क रुटका लागि दिइएका अनुमति हुन। लुक्ला वा जोमसोमजस्ता गन्तव्यमा जाने विमानका हकमा भने आठ वटा उडान अनुमति दिइएको छ। उहाँहरूले क्षमता हेरेर त्यसै अनुसार उडान गर्नुहुनेछ,” उनले भने।

पालना गर्नुपर्ने मापदण्ड के-के?
विमानस्थल र विमानमा पालना गर्नु पर्ने स्वास्थ्य मापदण्ड पालना गर्न आफूहरूले सर्वसाधारण, विमान कम्पनी र सबै विमानस्थलका प्रमुखहरूलाई जानकारी दिएको सरकारी भनाइ छ।

क्षेत्रीका अनुसार मास्क लगाउने, दूरी कायम गर्नुपर्ने, जहाजमा बस्दा फेसशील्ड लगाउनुपर्ने, टर्मिनलमा भिडभाड गर्न नहुने र उडानबीच केही दुरी कायम गरिनुपर्ने जस्ता मापदण्डहरूलाई सुरक्षा प्रोटोकलमा राखिएको छ।

विमान कम्पनीहरूले गत वर्ष पनि सङ्क्रमणकै बीचमा उडानहरू गरेको अनुभव भएको र त्यसै अनुसार मापदण्ड बनाइएको उनले बताएका छन्।

विमानस्थल पुग्न अगावै अनलाइन फर्म भर्नुपर्ने
तर त्यसका लागि यात्रुहरूले पनि नियम पालना गरिदिनु पर्ने नेपाल वायुसेवा सञ्चालक सङ्घका कोषाध्यक्ष समेत रहेका बुद्ध एयरका बजार निर्देशक रुपेश जोशी बताउँछन्।

“यात्रुहरूको हकमा मास्क त अनिवार्य छ। ज्वरो आएको हुनु भएन। सीसीएमसीको एउटा फर्म छ त्यो भरेर कोड नम्बर लिएर आएको हुनुपर्‍यो,” उनले भने।

उक्त फर्म www.ccmc.gov.np/drms मा उपलब्ध रहेको र त्यसमा यात्रुहरूको नामथर, गन्तव्य, उडान नम्बर, सिट नम्बर, नागरिकता वा राहदानी नम्बर उपलब्ध गराउनुपर्ने हुन्छ।

त्यसबाहेक गन्तव्यमा पुगेपछिको ठेगाना, मोबाइल नम्बर र ईमेल, नजिकको सम्पर्क व्यक्ति र ऊसँगको सम्बन्ध पनि उपलब्ध गराउनुपर्ने हुन्छ।

सङ्क्रमित भेटिएको अवस्था वा कन्ट्याक्ट ट्रेसिङमा सहज होस भनेर यस्तो व्यवस्था गरिएको अधिकारीहरूको भनाइ छ।

अनलाइनमार्फत यस्तो फारम भर्न नसक्ने मानिसहरूलाई भने विमानस्थलमै कोड दिइने बताइएको छ।

आन्तरिक उडान सुरु भएसँगै सङ्घीय राजधानी काठमाण्डू उपत्यकाबाट अन्य जिल्लाहरूमा आवतजावत गर्नका सहज हुने ठानिएको छ।

काठमाण्डू उपत्यकामा सडक मार्गबाट बिनाअनुमति आउन स्थानीय प्रशासनले रोक लगाउँदै आएको छ।-बिबिसी

प्रतिक्रिया दिनुहोस्