उपेन्द्रलाई काउन्टर दिन महन्थको यस्तो तयारी, कानुन व्यवसायीसँग गरे छलफल


जनता समाजवादी पार्टी नेपालका अध्यक्ष महन्थ ठाकुरले आफ्नो पक्षका कार्यकारिणी समितिको बैठक बोलाएका छन् । निर्वाचन आयोगलाई जवाफ पठाउने निर्णय गर्नका लागि कार्यकारिणी समितिको बैठक बोलाइएको हो । जसपाका अध्यक्ष उपेन्द्र यादवले दलको आधिकारिकताका लागि निर्वाचन आयोगमा निवदेन दिएपछि आयोगले ठाकुरलाई पत्र पठाएर त्यसमा आफ्नो तर्फबाट १५ दिनभित्र जवाफ पठाउन भनेको छ ।

अध्यक्ष ठाकुरले पनि पार्टीमा आफ्नो बहुमत रहेको दाबीसहितको पत्र पठाउने तयारीमा लागेको बताइएको छ । त्यसका लागि अध्यक्ष ठाकुरले बुधवार बबरमहलस्थित मधेश भवनमा अधिवक्ताहरूसँग छलफल गरेका छन् । अध्यक्ष ठाकुरले निर्वाचन आयोगमा उपेन्द्र यादवले दावी गर्दै प्रस्तुत गरेका कागजात र आफ्नो तर्फबाट प्रस्तुत गर्न लागेको कागजात राखेर कानुन व्यवसायीहरूसँग छलफल गरेका हुन् ।

निर्वाचन आयोगले गत पुस ७ गते बसेको कार्यकारिणी समितिको बैठकले गरेको निर्णयलाई मान्यता दिए महन्थ ठाकुरको बहुमत पुग्ने तर बैठकलाई निर्वाचन आयोगले मान्यता नदिए यादवको बहुमत पुग्ने तर्क अधिवक्ताहरूको थियो । छलफलमा सहभागी एक नेताका अनुसार २०७७ पुस ७ गते यता कार्यकारिणी समितिको संयुक्त बैठक बसेको छैन । त्यसयता बसेका सबै बैठक विवादित छन् । दुवै समुहको छुट्टा छुट्टै बैठकहरू बसे पनि त्यसलाई निर्वाचन आयोगले मान्यता दिएको छैन । निर्वाचन आयोगले पुस ७ गतेको बैठकलाई मान्यता दिनेमा कानुन व्यवसायीहरु विश्वस्त छन् ।

निर्वाचन आयोगले जसपाको कार्यकारिणी समितिलाई मात्र चिन्दछ । कार्यकारिणी समितिको बैठकमा जसको बहुमत हुन्छ, त्यसैले पार्टीको आधिकारिकता पाउने अधिवक्ताहरूले सुझाव दिएका छन् । पुस ७ गतेको निर्णयबाट पाएको अधिकार अनुसार नै अध्यक्ष महन्थ ठाकुरले कार्यकारिणी समितिमा उपेन्द्र यादवको पक्षबाट २० जना हटाएर आफ्नो तर्फबाट २० जना राखेर कार्यकारिणी समिति ५१ सदस्यीय कायम गरिएको सो पक्षको दाबी छ । त्यही ५१ सदस्यीय कार्यकारिणी समितिको बैठक बोलाएको छ । त्यो बैठकबाट निर्णय गरेर निर्वाचन आयोगमा जाने तयारी रहेको छ । सबै कागजात तयार गरेर आइतवार निर्वाचन आयोग जाने तयारीमा ठाकुर जुटेका छन् ।

प्रतिक्रिया दिनुहोस्