ज्वाला संग्रौलाले स्पष्टिकरण दिँदै यस्तो भनिन


काठमाडौं । बर्दीमा रहेका प्रहरीलाई प्रहरी कार्यालयभित्रै थर्काएर विवादमा आएकी ज्वाला संग्रौलाले फेसबुकमार्फत स्पष्टीकरण दिएकी छन् । आफूले प्रहरीलाई सरुवा गराइदिने चेतावनी दिएको स्वीकारे पनि जातको कुरा नगरेको उनको भनाइ छ ।

ज्वालाको समूह र प्रहरीबीच महाराजगञ्ज ट्राफिक प्रहरी वृत्तमा विवाद भएको थियो । त्यस क्रममा उनले प्रहरी सहायक निरिक्षक मणीकान्त झालाई सरुवा गराइदिने चेतावनी दिएकी थिइन् ।

उनले आज फेसबुकमा लेखेकी छन्, ‘जनताको लागि काम गर्नेले जनतालाई बिनाकारण दुख दिन्छ भने त्यो जोसुकै होस, त्यसको सरुवा-घटुवाको बकाइदा माग गरिन्छ । यसमा जातको कुरा कसरी आयो ? मेरो मुखबाट निस्कएका एक-एक शब्दको जिम्मेवारी लिँदै जहाँ बोलाउने हो त्यहाँ आएर जवाफ दिनेछु ।

उनले आफूमाथि प्रहरीले मुख छाडेको दावी गरेकी छन् । आफूहरु मोटरसाइकलमा आउँदै गर्दा असइ झाले बाटोमा एक्कासी रोकेर ‘बिस्तारै कुदाउन सक्दैनस मासाले’ भन्दै झम्टिएको उनको भनाइ छ ।

घटनामा आफ्नो समूहबाट भएका कमजोरीको नैतिक जिम्मेवारी लिएर क्षमायाचना गर्ने उनले बताएकी छन् ।

प्रतिक्रिया दिनुहोस्