एमाले स्थायी कमिटीको बैठक अनिश्चितकालका लागि स्थगित


सत्तासीन दल नेकपा एमालेको स्थायी कमिटीको बैठक स्थगित भएको छ ।

बिहीबार अपराह्न चार बजेका लागि बोलाइएको स्थायी कमिटी बैठक अनिश्चितकालका लागि स्थगित भएको कार्यालय सचिव शेरबहादुर तामाङले जानकारी दिए । उनका अनुसार बैठक कहिले बस्ने भन्ने टुंगो लागेको छैन ।

यसअघि बुधबार बोलाइएको स्थायी कमिटी बैठक पार्टीभित्रको विवाद समाधानका लागि माधव नेपाल समूहका दोस्रो तहका नेताहरुसँग छलफल सुरु भएपछि बिहीबारका लागि सारिएको थियो ।

नेपाल समूहको बैठक जारी

नेकपा एमालेमा माधव नेपाल पक्षको केन्द्रीय कमिटी बैठक बसिरहेको छ । बिहान ११ बजेदेखि शुरु भएको भर्चुअल बैठकमा पछिल्लो राजनीतिक परिस्थिति र पार्टी एकताका लागि भएका प्रयास र सम्भावनाबारे नेताहरूले धारणा राखिरहेको बताइएको छ ।

पार्टी एकतालाई लिएर दुवै समूहभित्र दुई धार रहेको बताइन्छ । ओली समूहमा अध्यक्ष ओलीसहितका अधिकांश नेता बरिष्ठ नेताद्वय झलनाथ खनाल, माधव नेपाल,भीम रावल लगायतका नेताहरुसहितको एकताको सम्भावना अन्त्य भएको निष्कर्षमा पुगेको बताइन्छ । तर, सो समूहका दोस्रो तहका ३-४ जना नेता भने अझै पनि सिंगो एकताका लागि भन्दै नेपाल पक्षका नेताहरुसँग अनौपचारिक छलफल गरिरहेका छन् ।

नेपाल समूहमा पनि वरिष्ठ नेताद्वय खनाल र नेपालसहितका अधिकांश नेताहरु ओलीसँग मिल्न नसकिने निष्कर्षमा पुगेको बताइन्छ । सो समूहमा तत्काल पार्टी गठन गरेर जान कार्यकर्ताहरुको चर्को दबाब बढेको छ । तर दोस्रो तहका नेताहरु घनश्याम भुसाल,योगेश भट्टराई,सुरेन्द्र पाण्डे र गोकर्ण बिष्ट भने तत्काल नयाँ पार्टी गठन गर्ने कुरामा सहमत नरहेको चर्चा छ ।

पार्टी विभाजन र एकताको प्रयास संगसंगै अघि बढिरहेको चर्चा चलेका बेला आजको बैठकलाई चासोका साथ हेरिएको छ ।

प्रतिक्रिया दिनुहोस्